Lideri i PDSH-së, Menduh Thaçi ka theksuar se e vetmja rrugëdalje dhe e vetmja politikë serioze preventive në Maqedoni është vendosja urgjente e protektoratit ndërkombëtar, me ç’rast brenda një viti të organizohen zgjedhje të parakohshme nën patronazhin e bashkësisë ndërkombëtare, dhe më pastaj të ketë lëvizje të përbashkëta drejt së ardhmes.
“Situata është katastrofale në Maqedoni. Nuk mund të them se është tragjike, por vlerësojë se është shumë dramatike. Kultura politike që e drejton Maqedoninë me fjalorin më të butë që mund t`i them është se ajo është tejet joserioze. Edhe të tjerët që provojnë të bëjnë matematika politike me numra gjithashtu janë joserioz”, ka theksuarThaçi.
Ai me këtë rast ka propozuar se si rrugëdalje e vetme mbetet protektorati ndërkombëtar. “Mendoj se e vetmja rrugëdalje dhe e vetmja politikë serioze preventive është që urgjentisht të vendoset protektorati ndërkombëtar në Maqedoni, dhe pastaj brenda një viti të organizohen zgjedhje të parakohshme nën patronazhin e bashkësisë ndërkombëtare dhe më pastaj të lëvizim përpara të gjithë së bashku”, ka theksuar lideri i PDSH-së.
Lidhur me zërat se çfarë parashikime do të ndodhin pas 7 dhjetorit, Thaçi ka nënvizuar se PDSH nuk është edhe aq kureshtare lidhur me këtë datë. “Mendoj se këtyre duhet t`i lihet hapësirë që të zihen në atë politikë tejet të gabuar që kanë bërë. PDSH do të vazhdojë të sensibilizojë se këtu zgjidhje është vetëm protektorati, përndryshe situata është dramatike”, ka theksuar Thaçi, pas një takimi ku ka prezantuar tre këshilltarët e tij që janë pjesë e ekipit këshillëdhënës: Isen Ramadani, politikani me karrierë të gjatë politike, prof.dr. Xheladin Murati, politikan dhe ligjërues universitar si dhe eksperti i çështjeve juridike dhe Beqir Iseni, ish-kryetari i Këshillit Gjyqësor Republikan. /INA/
Hits: 755
Comments (3)
Show/hide comments
Write comment
